اسی طرح نیویارک کے علاوہ قریبی علاقوں میں بھی سکول بند ہیں جبکہ براڈوے کے تھیٹرز بھی بند پڑے ہیں۔

ظہران ممدانی کا کہنا ہے کہ ’نیویارک میں ہنگامی صورت حال برقرار ہے اور سفر سے متعلق ایڈوائزری بھی موجود ہے۔‘

محکمہ موسمیات سے منسلک ماہر موسمیات باب اورویک کے مطابق نیویارک سٹی کے سینٹرل پارک میں دوپہر ایک بجے تک 48 سینٹی میٹر سے زیادہ برف پڑی جبکہ بوسٹن میں 14 انچ تک برفباری ہوئی۔

رپورٹس کے مطابق علاقے میں چلنے والی ہواؤں کی رفتار 40 سے 60 میل فی گھنٹہ تک پہنچ رہی ہے اور شدید برفباری بھی ہو رہی ہے۔

باب اورویک کا کہنا ہے کہ جتنی برف پڑ چکی ہے اس کو ہٹانے میں شاید ایک ہفتہ لگے۔

فلاڈیلفیا میں 14 انچ برف پڑی ہے جبکہ رہوڈ آئی لینڈ میں ہر طرف 32 انچ سے زیادہ برف کی تہہ جم گئی ہے، جو کہ ایک ریکارڈ ہے۔

شدید برفباری پر لوگ حیران و پریشان ہیں اور ان کا کہنا ہے کہ ایسی صورت حال پہلے کبھی نہیں دیکھی۔

لانگ آئی لینڈ کے نیو ہائیڈ پارک میں 20 برس سے رہنے والی سینڈرا وو کا کہنا ہے کہ ’موسم سرما میں کبھی اس قدر شدید طوفان نہیں دیکھا، میرے گھر کے سامنے کا دروازہ نہیں کھل رہا اور باہر صرف کھڑکیوں میں سے ہی دیکھا جا سکتا ہے۔‘ ان کا مزید کہنا تھا کہ ’میرے شوہر نے گیراج سے باہر جا کر کھودنے کی کوشش کی مگر کامیاب نہیں ہو سکے۔‘

امریکہ کی کم سے کم سات ریاستوں میں ہنگامی صورت حال کا اعلان کیا گیا ہے۔ فلائٹ اویئر ڈاٹ کام کے مطابق پیر کی سہ پہر تک مختلف ایئرلائنز کی سات ہزار 400  پروازیں منسوخ کی گئیں جبکہ مزید دو ہزار تین سو تاخیر کا شکار ہوئیں۔ زیادہ تر پروازیں شمال مشرقی امریکہ کے علاقوں میں منسوخ ہوئیں اور ان میں وہ پروازیں بھی شامل تھیں جنہوں نے جان ایف کینیڈی، لوگن اور نیو جرسی کے ہوائی اڈوں سے اڑان بھرنا تھی۔